Zilziladan so‘ng bir yilda Malatyada nimalar qilindi?
Bu bo‘yicha viloyat gubernatori jurnalistlarga maʼlumot berdi.
Turkiyada zilziladan keyin amalga oshirilgan ishlar bilan tanishish maqsadida Turkmaniston, Qirg‘iziston, Qozog‘iston, O‘zbekiston va Shimoliy Kipr Turk Respublikasidan kelgan jami 34 nafar OAV vakillari safarning uchinchi kuni Malatya viloyatida bo‘lishdi.
Malatya gubernatori Ersin Yaazachi qardosh xalqlar matbuot vakillari bilan muloqotda bo‘layotganidan xursandligini bildirib, viloyatda tabiiy ofat zararlari va uni bataraf etish yo‘lidagi chora-tadbirlar xususida so‘z yuritdi.
Gubernatorning taʼkidlashicha, sog‘liqni saqlash tizimidagi katta shifoxonalar zarar ko‘rmagan. Shu sababli ular bir maromda o‘z faoliyatini davom ettirgan.
Viloyatdagi 46 ta maktab tabiiy ofatdan zarar ko‘rgan, 2 tasi vayron bo‘lgan. 855 ta sinfxonaga shikast yetgan. Ayni paytda 1600 ta sinfxona taʼmirlanmoqda, ularning 500 tasi foydalanishga tayyor bo‘lgan.
Aholiga ham moddiy, ham maʼnaviy yordam berish ishlari davom ettirilmoqda. Shu davrga qadar zilziladan aziyat chekkan fuqarolarga 6,1 milliardlik moddiy yordam, har oyda 5 ming liradan “Esen” plastik kartalariga pul tushirib berilmoqda. Shuningdek, zilzila natijasida ruhiy jarohat olganlar bilan psixologlar, ekspertlar va din vakillari shug‘ullanishmoqda.
Gubernator Malayatda hayot davom etayotgani, bir-ikki yilda o‘z maromiga tushib ketishini, boshqa joylarga ko‘chib ketganlar yana qaytishiga umid bildirdi.
