Prezident “OTP” banki boshqaruvi raisi bilan uchrashdi
Uchrashuv yakunida raisga “Do‘stlik” ordeni topshirildi.
Bugun, 13 fevral kuni Prezident Shavkat Mirziyoyev Vengriyaning eng yirik “OTP” banki boshqaruvi raisi Shandor Chanini qabul qildi.
Uchrashuvda bank-moliya sohasidagi, shu jumladan “OTP” guruhiga davlatning “Ipoteka-bank”dagi ulushini sotish bo‘yicha bitim doirasidagi hamkorlikning ijobiy surʼati mamnuniyat bilan qayd etildi.
Davlat rahbari bank xizmatlarini raqamlashtirish orqali ularning sifatini oshirish, kichik va oilaviy biznes uchun innovatsion va hamyonbop moliyaviy mahsulotlarni joriy qilish, xodimlarni Yevropaning eng namunali amaliyotlariga o‘qitish muhimligini taʼkidladi.
Vengriyaning yetakchi kompaniyalari bilan, shu jumladan Toshkent viloyatida ular uchun tashkil etilayotgan maxsus iqtisodiy zona negizida qishloq xo‘jaligi, vinochilik, irrigatsiya, kimyo, farmatsevtika va sanoatning boshqa tarmoqlarida kooperatsiyani yana-da chuqurlashtirish masalalari ko‘rib chiqildi.
Shandor Chani, o‘z navbatida, Vengriya biznesi mamlakat bozoridagi faoliyatini jadal kengaytirishga tayyorligini tacdiqladi.
Uchrashuv yakunida “OTP” banki boshqaruvi raisi uning faoliyatiga berilgan yuksak eʼtirof hamda o‘ziga davlat mukofoti – “Do‘stlik” ordeni topshirilgani uchun O‘zbekiston yetakchisiga chuqur minnatdorlik bildirdi.
