Qarshida o‘qishga kiritish bilan bog‘liq firibgarlik aniqlandi
Hozirda holat yuzasidan jinoiy ish ochilgan.
Ikkita viloyatda ishga va o‘qishga kiritib qo‘yishni vaʼda qilgan firibgarlar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Qayd etilishicha, fuqaro D.N. fuqaro A.X.ning ishonchiga kirib, uni yuqori lavozimda ishlovchi tanishlari yordamida “Sho‘rtangaz kimyo majmuasi” MCHJning qurilish va taʼmirlash boshqarmasiga ishga kirtib qo‘yishi evaziga 1 500 AQSH dollarni olgan vaqtida ashyoviy dalillar bilan ushlangan.
Shuningdek, “Ch.C.” MCHJ rahbari U.K. fuqaro N.A.ni Qarshi shahar Axborot texnologiyalari va menejment universitetiga o‘qishga kiritib qo‘yishi evaziga 12 mln so‘mni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
