IT taʼlim sohasida xususiy sektorni qo‘llab-quvvatlash muhokama qilindi
Raqamli texnologiyalar vazirligida tashkil etilgan forum malakali mutaxassislarni tayyorlash tizimini yo‘lga qo‘yish, yoshlar va xususiy sektorni qo‘llab-quvvatlashga bag‘ishlandi.
Tadbirda raqamli texnologiyalar vaziri Sherzod Shermatov ishtirok etib, IT-taʼlimni rivojlantirish borasida amalga oshirilayotgan ishlar, belgilab berilgan vazifalar va qarorlar ijrosini taʼminlash borasida kerakli maʼlumotlar berib o‘tdi.
Xabaringiz bor, “Raqamlashtirish sohasida malakali mutaxassislar tayyorlash faoliyatini qo‘llab-quvvatlash bo‘yicha qo‘shimcha chora-tadbirlar to‘g‘risida”gi 2024 yil 1 fevraldagi Prezident qaroriga asosan “IT-Talents” dasturi joriy etilgan edi.
Mazkur forumda yuqoridagi qarorning ijro mexanizmi haqida batafsil maʼlumotlar taqdim etildi.
“IT Talents” dasturi — IT-Park rezidenti bo‘lgan IT-xizmatlarni eksport qiluvchi kompaniyalarga yuqori malakali mutaxassislarni tayyorlab beruvchi nodavlat taʼlim tashkilotlari faoliyatini rivojlantirish hamda kengaytirishni rag‘batlantirishga qaratilgan loyiha hisoblanadi.
Yuqoridagi qarorga asosan, 2024 yil 1 martdan boshlab nodavlat taʼlim tashkilotlari bitiruvchisi IT-xizmatlarni eksport qiluvchi tashkilotga ishga joylashganda bazaviy hisoblash miqdorining 75 baravarigacha, nogironligi bo‘lgan yosh bitiruvchisi bunday tashkilotga ishga joylashgan hollarda esa 105 baravarigacha bir martalik rag‘batlantirish tizimi yo‘lga qo‘yiladi.
Ingliz tilini bilish bo‘yicha B2 va undan yuqori darajadagi sertifikatga ega bo‘lgan yoshlarning xalqaro IT-sertifikatlar olish xarajatlarini to‘liq qoplab berish tartibi joriy etiladi.
Forum davomida bugungi kunda o‘quv markazlar uchun yaratilayotgan imkoniyatlar, IT-eksport kompaniyalarning mutaxassislarga bo‘lgan ehtiyoji hamda IT-kurslarga bo‘lgan talablar, shuningdek, biznesni rivojlantirishga doir foydali maʼlumotlar taqdim etildi.
Shuningdek, tadbir davomida IT-xizmatlar eksporti bilan shug‘ullanuvchi yirik kompaniyalarning soha mutaxassislariga bo‘lgan ehtiyoji va talablari hamda IT-sohasidagi o‘quv markazlarida sifatli kadrlar tayyorlash to‘g‘risida taqdimotlar o‘tkazildi.
