Qalbaki pullar savdosi fosh etildi: 297 mln so‘mlik banknotlarni 148 mln so‘mga sotgan shaxs ushlandi
Uning uyidan qalbaki banknotlar tayyorlashda foydalanilgan printer, maxsus qog‘ozlar va boshqa uskunalar ham topilgan.
Davlat xavfsizlik xizmatining Toshkent shahar va Andijon viloyati bo‘yicha boshqarmalari xodimlari tomonidan o‘tkazilgan tezkor tadbir davomida uy sharoitida qalbaki pul tayyorlash va ularni muomalaga kiritish bilan shug‘ullangan shaxs fosh etildi.
Aniqlanishicha, Asaka tumanida yashovchi, 1987-yilda tug‘ilgan, muqaddam firibgarlik bilan bog‘liq jinoyat uchun sudlangan fuqaro 100 va 200 ming so‘mlik qalbaki banknotlardan iborat jami 297 mln so‘mlik pullarni shartli xaridorga 148 mln so‘mga sotgan vaqtida ashyoviy dalillar bilan ushlangan.
Tezkor tadbir davom ettirilib, uning yashash xonadoni ko‘zdan kechirilgan. Natijada uyda qalbaki banknotlar tayyorlashda foydalanilgan kompyuter, “Epson” rusumli printer, A4 hajmdagi maxsus qog‘ozlarga chop etilgan yarim tayyor 50 va 100 ming so‘mlik kupyuralar hamda qog‘oz kesuvchi uskunalar aniqlanib, protsessual tartibda rasmiylashtirib olingan.
Holat yuzasidan DXX Toshkent shahar bo‘yicha boshqarmasi tomonidan mazkur fuqaro va boshqalarga nisbatan Jinoyat kodeksining 176-moddasi 3-qismi “a” bandi bilan jinoyat ishi qo‘zg‘atilgan.
Hozirda tergov harakatlari olib borilmoqda. Tergov doirasida gumonlanuvchining jinoiy aloqalarini aniqlash hamda ishga aloqador boshqa holatlarga huquqiy baho berish bo‘yicha zarur chora-tadbirlar amalga oshirilmoqda.
