Kinematografiya agentligi direktori nodavlat telekanallar rahbarlari bilan uchrashdi
Yig‘ilishda telekanallar bilan hamkorlik asosida teng sheriklikda seriallar ishlab chiqarilishi kelishib olindi.
Toshkentdagi Renessans kinouyida Kinematografiya agentligi direktorining nodavlat telekanallar rahbarlari bilan uchrashuvi bo‘lib o‘tdi.
Unda "Mening yurtim", “Milliy”, “Renessans”, “Sevimli”, "Zo‘r TV" hamda O‘zMMA rahbar va xodimlari, rejissyorlar ishtirok etdi.
Davra suhbati 2023 yil dekabr oyida Prezident raisligida o‘tkazilgan Respublika Maʼnaviyat va maʼrifat kengashining yig‘ilishida belgilangan chora-tadbirlar ijrosini taʼminlash maqsadida tashkil etildi. Yig‘ilishda davlat rahbari tomonidan milliy seriallarni g‘oyaviy-badiiy va texnik jihatdan jozibali, hamma qiziqib ko‘radigan darajaga yetkazish zarurligi taʼkidlangan edi.
Shu maqsadda Kinematografiya agentligi nodavlat telekanallar o‘rtasida “Har bir serial bir missiya” nomli serial loyihalari uchun tanlov eʼlon qildi. Uchrashuvda g‘olib deb topilgan serial loyihalari Agentlikning 2024 yil tematik rejasiga kiritilishi va ular asosida telekanallar bilan hamkorlik asosida teng sheriklikda seriallar ishlab chiqarilishi kelishib olindi.
Shuningdek, yil davomida 200 dan ortiq kinomahsulotlarni telekanallarga taqdim etilishi belgilab olindi.
