Shahrisabzda o‘quvchi “zamdirektor” bilan mushtlashdi
Hozirda ularning ikkalasi ham shifoxonaga yotqizilgan.
Ijtimoiy tarmoqlarda Qashqadaryo viloyatining Shahrisabz shahridagi maktablarning birida direktor o‘rinbosarining ko‘ziga yuqori sinf o‘quvchisi musht tushirgani, biroq chora ko‘rilmayotgani haqida xabarlar tarqaldi. Holat yuzasidan shahar hokimligi munosabat bildirdi.
Qayd etilishicha, 19 fevral kuni soat 10:45 larda Shahrisabz shahar 1-sonli o‘rta umum taʼlim maktabda maʼnaviy-maʼrifiy ishlar bo‘yicha direktor o‘rinbosari Sh.Kenjayev dars vaqtida o‘quvchilar darsga kirmasdan qor o‘ynagani uchun ularga darsga kirishlarini gapirib, maktab sinfxonasiga kirgizmoqchi bo‘lgan.
Shu paytda 10-«F» sinf o‘quvchisi J.Boqiyev Sh.Kenjayevga qarshilik ko‘rsatgan. Shundan so‘ng Sh.Kenjayev o‘quvchini xonasiga olib kirib gaplashgan va uni urgan, shunda o‘quvchi ham Sh.Kenjayevning yuz qismiga musht tushirgan.
Hozirda o‘quvchi va o‘qituvchi shifoxonaga yotqizilgan. Shahrisabz shahar IIB tomonidan tergovga qadar tekshiruv ishlari olib borilmoqda.
