Toshkentning ayrim hududlarida gaz ta’minoti vaqtincha to‘xtatiladi: hududlar ma'lum qilindi
O‘rta bosimli gaz quvurida aniqlangan sizib chiqish holatini bartaraf etish uchun ta’mirlash ishlari olib boriladi.
2026-yil 2-noyabr kuni Toshkent shahri Mirobod tumanining ayrim hududlarida tabiiy gaz ta’minotida vaqtinchalik cheklovlar joriy etiladi. Bu haqda “Hududgaz Poytaxt” gaz ta’minoti filiali matbuot xizmati xabar berdi.
Ma’lum qilinishicha, Qo‘yliq dahasi, Yangi Qo‘yliq ko‘chasidagi o‘rta bosimli gaz quvurida aniqlangan sizib chiqish holatini bartaraf etish uchun ta’mirlash ishlari olib boriladi. Shu sababli soat 10:00 dan 14:00 ga qadar quyidagi hududlarda gaz ta’minoti vaqtincha to‘xtatiladi:
-
Qo‘yliq dahasining 1–4-dahalaridagi 51 ta ko‘p qavatli uyda joylashgan 4 200 ta xonadon;
-
Oltinko‘l va Qorasuv mahallalaridagi 22 ta ko‘p qavatli uyda joylashgan 516 ta xonadon;
-
Oltinko‘l va Qorasuv mahallalaridagi 1 455 ta yerli xonadon.
Shuningdek, Qo‘yliq dahasidagi ayrim korxonalar, savdo va xizmat ko‘rsatish obyektlari, jumladan, nonvoyxonalar hamda Oltinko‘l va Qorasuv mahallalaridagi ulgurji iste’molchilarda gaz ta’minoti cheklanadi.
Bundan tashqari, 2-tor Farg‘ona yo‘li ko‘chasida tabiiy gaz bosimi pasayadi.
Ta’mirlash ishlari yakunlangach, gaz ta’minoti bosqichma-bosqich qayta tiklanadi.
