Avtobus eshigi qatnov vaqtida shikastlandi: hodisa tafsilotlari ma’lum qilindi
Nosozlik so‘nggi qatnov vaqtida yuzaga kelgan.
Ijtimoiy tarmoqlarda avtobus eshigining nosoz holati aks etgan videolavha tarqaldi. “Toshshahartransxizmat” AJ holat yuzasidan rasmiy munosabat bildirdi.
Qayd etilishicha, hodisa 2026-yil 1-noyabr kuni davlat raqami 01/054 JFA, saroy raqami 663 bo‘lgan avtobusda sodir bo‘lgan.
Ma’lum qilinishicha, avtobus shu kuni soat 06:45 da texnik soz holatda yo‘nalishga chiqarilgan va kun davomida yo‘lovchilarga xizmat ko‘rsatgan. Kechki payt so‘nggi qatnovini amalga oshirayotganida, oxirgi bekatga yaqinlashish chog‘ida uning orqa eshigida kutilmagan nosozlik yuzaga kelib, eshik shikastlangan.
Haydovchi yo‘lovchilarni so‘nggi bekatda tushirgach, avtobusni saroyga qaytargan. Transport vositasi soat 22:00 da avtobus saroyiga olib kelingan.
Kompaniya ma’lumotiga ko‘ra, avtobusdagi nosozlik to‘liq bartaraf etilib, zarur ta’mirlash ishlari amalga oshirilgan va transport vositasi texnik soz holatga keltirilgan.
