Mobil radarlar yashirin ishlashi mumkin: haydovchilarni oldindan ogohlantirish talabi bekor qilindi
Endilikda bu talab faqat statsionar radarlarga nisbatan amal qiladi.
O‘zbekistonda avtomobil yo‘llarida mobil radarlar joylashgani haqida haydovchilarni maxsus yo‘l belgilari orqali oldindan ogohlantirish talabi bekor qilindi. Endilikda ushbu talab faqat statsionar radarlarga nisbatan qo‘llaniladi.
Hukumatning 2026-yil 29-oktyabrdagi qarori bilan tegishli tartibga o‘zgartirish kiritildi. Hujjat 30-oktyabrdan kuchga kirgan.
Avval amalda bo‘lgan tartibga ko‘ra, tezlikni nazorat qiluvchi statsionar va mobil radarlar joylashgan hududda, shuningdek, ulargacha 250–500 metr masofada “Radar” yo‘l belgisini o‘rnatish majburiy edi.
Yangi qarorga muvofiq, mazkur talab endilikda faqat statsionar radarlar uchun saqlanib qoladi.
Shuningdek, hujjat bilan 2026-yil 1-noyabrdan tadbirkorlar tomonidan o‘rnatilgan maxsus foto va video qayd etish vositalari orqali xavfsizlik kamaridan foydalanish qoidalariga rioya etmaslik holatlarini qayd etishga ruxsat berildi.
