Ayrim mahsulotlar ishlab chiqaruvchilariga suv tekin yetkazib beriladi
Qonunchilik palatasidagi Ekologik partiya fraksiyasining navbatdagi yig‘ilishi bo‘lib o‘tdi.
Qonun loyihasi bilan qishloq xo‘jaligi mahsulotlari ishlab chiqaruvchilariga suv yetkazib berish xizmatlari uchun to‘lovlarni bekor qilish ko‘zda tutilmoqda. Bir qator qonunlarga Suv xo‘jaligi vazirligining tuman (Quvasoy shahar) irrigatsiya bo‘limlari hamda maxsus xizmatlari negizida “Suv yetkazib berish xizmati” davlat muassasalari tashkil etilganligi munosabati bilan tegishli o‘zgartirishlar kiritilmoqda.
Shuningdek, loyihada hududlar bo‘yicha suv olish limitlari xalq deputatlari tuman kengashlari tomonidan tasdiqlanishi haqidagi normani belgilash ko‘zda tutilmoqda.
Yig‘ilishda fraksiya a’zolari qonun loyihasi suv resurslarini samarali boshqarish, ular yuzasidan to‘laqonli hisob va hisobot yuritish, shuningdek mazkur jarayonlarga xalq deputatlari mahalliy kengashlarining ishtirokini ta’minlash orqali yer va suvga doir munosabatlarining huquqiy asosini yanada takomillashtirishga xizmat qilishini qayd etdi.
