Angrenda "Telefonsiz maktab" tizimi joriy etilmoqda
Hozirda ushbu tashabbus 2 ta maktabda amalga oshirilgan.
Avvalroq Toshkent viloyati hokimi Zoir Mirzayev viloyatda "Telefonsiz maktab" tashabbusini ilgari surib, o‘qituvchilari va o‘quvchilari telefon ishlatishdan voz kechgan maktabga 300 million so‘m pul mukofoti berishini maʼlum qilgandi.
Maktablarda telefonlardan foydalanishni taqiqlash tashabbusi Angren shahridagi ikkita – 13 va 17-sonli umumtaʼlim maktablarida boshlandi.
Hokimlik dars vaqtida o‘quvchilarning telefonlari saqlanadigan shkaflarni ko‘rsatdi. Har bir shkaf alifbo tartibida raqamlangan.
Mazkur maktablar maʼmuriyati hozirda o‘quvchilarning chalg‘imasligi, ularning eʼtibori o‘qituvchilar ular bilan baham ko‘radigan bilimlarni egallashga qaratilayotganini taʼkidladi.
Shuningdek, maktab maʼmuriyatida ota-onalar qo‘mitasi vakillari ishtirokida yig‘ilish o‘tkazilgani taʼkidlandi. Yig‘ilishda taʼlim muassasasida telefonlardan umuman foydalanmaslik taklifi ilgari surildi.
