Hindiston chegarani qo‘riqlash uchun 10 ming askar yubordi
Shuningdek, 9 ming askar jangovar qo‘mondonlik tarkibiga o‘tkaziladi.
Hindiston Xitoy bilan chegarani qo‘riqlash uchun qo‘shimcha 10 ming askarini yubordi. Bu haqda Bloomberg nashri xabar bermoqda.
Qayd etilishicha, Xitoy bilan bahsli chegara hududidagi 9000 askardan iborat mavjud kontingent yangi tashkil etilgan jangovar qo‘mondonlik tarkibiga o‘tkaziladi. Birlashgan kuchlar Xitoyning Tibet mintaqasini Hindistonning shimoliy Uttarakhand va Himachal-Pradesh shtatlari bilan ajratib turadigan 532 kilometrlik chegara chizig‘ini qo‘riqlaydi.
2020 yilda XXR bilan chegarada sodir bo‘lgan to‘qnashuv natijasida kamida 20 hind chegarachisi halok bo‘lgan, bu esa ikki davlat orasidagi aloqalarni jiddiy ravishda yomonlashtirgandi.
O‘shandan beri Xitoy va Hindiston chegaradagi harbiy infratuzilmalarini yangiladi, shuningdek, qo‘shinlar, raketalar va samolyotlarni chegara oldi hududlarga joylashtirdi.
