Amudaryoda 77 tonna sifatsiz yog‘ fosh bo‘ldi
Hozirda holat yuzasidan jinoiy ish ochilgan.
Qoraqalpog‘iston Respublikasi Amudaryo tumanida 77,1 tonna qo‘lbola usulda tayyorlangan yog‘ mahsulotlarini savdoga chiqarilishining oldi olindi. Bu haqda Bosh prokuratura huzuridagi Iqtisodiy jinoyatlarga qarshi kurashish Departamenti xabar berdi.
Maʼlum bo‘lishicha, Buxoro viloyati Romitan tumanida davlat ro‘yxatidan o‘tgan “T.” MCHJ hamda Amudaryo tumanida faoliyat ko‘rsatuvchi “A.” MCHJ masʼul shaxslari o‘zaro til biriktirib, “A.” MCHJga tegishli noturar binoda yog‘ mahsulotlari ishlab chiqaruvchi yashirin sex tashkil qilgan.
Tadbir davomida ushbu yashirin sexdan qo‘lbola usulda tayyorlangan 77,1 tonna 5 litr hajmdagi yelim idishlarga qadoqlangan isteʼmolga yaroqsiz yog‘ mahsuloti, 19 460 dona xo‘jalik sovuni, 10 TN. paxta chigiti, 3 TN. kunjara, 32 ta rulon yorliqlar, 8 dona moy-juvoz uskunasi va boshqa ishlab chiqarishda foydalanilgan jami 1,3 mlrd so‘mlik tovarlar moddiy boyliklari ashyoviy dalil sifatida olingan.
Mazkur holat yuzasidan Jinoyat kodeksining 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) va 186-2-moddasi (chigitdan olinadigan mahsulotni qonunga xilof ravishda ishlab chiqarish yoki muomalaga kiritish) bilan jinoyat ishi qo‘zg‘atilib, tergov harakatlari o‘tkazilmoqda.
