2023-yilda salkam 150 ta kinomahsulot yaratildi
5 ta xorijiy davlat bilan Anglashuv memorandumlari va hamkorlik dasturlari imzolanib, 4 ta davlatda “O‘zbekiston madaniyati kunlari” hamda O‘zbekistonda 4 ta xorijiy davlatning “Madaniyat kunlari” tashkil etildi.
AOKAda Madaniyat vaziri Ozodbek Nazarbekov va mutasaddilar ishtirokida o‘tkazilgan matbuot anjumanida tizimda 2023 yilda amalga oshirilgan ishlar sarhisobi va 2024 yildagi ustuvor vazifalar haqida maʼlumot berildi.
Respublika bo‘yicha o‘tkazilgan 17 202 ta konsert-tomosha tadbirda 9 million 687 ming, teatrlarda uyushtirilgan 10 586 ta spektakl seansi orqali 3 million 203 ming nafar tomoshabin, “O‘zbeksirk” davlat muassasasidaning 604 ta sirk tomoshalari natijasida 42 ming nafar tomoshabin qamrab olingan.
O‘tgan yilda Navoiy, Namangan hamda Qashqadaryo viloyat qo‘g‘irchoq teatrlari uchun yangi bino qurildi, shuningdek, 7 ta madaniyat markazi taʼmirlanib foydalanishga topshirildi.
Kinematografiya sohasida qator amaliy ishlar amalga oshirildi, jumladan, 149 ta kinomahsulot – shundan 21 ta badiiy film, 73 ta hujjatli film, 10 ta multfilm, 9 ta serial, 36 ta qisqa-metrajli filmlar yaratildi.
Bugungi kunda Madaniyat vazirligi tizimida jami 368 ta taʼlim muassasasi faoliyat olib bormoqda. Jumladan, 324 ta bolalar musiqa va sanʼat maktabi, 30 ta ixtisoslashtirilgan sanʼat va madaniyat maktabi, maktab-internatlari, 2 ta kollej va 1 ta texnikum, 5 ta oliy taʼlim muassasasi va ularning 4 ta filiali hamda 2 ta malaka oshirish markazlari mavjud.
