Surxondaryoda soliqchi bilan janjallashgan ayollarga chora ko‘rildi
Ular davlat xizmatchisini obro‘sizlantirishga harakat qilgan.
Avvalroq Surxondaryo viloyatidagi bozorda savdo qilayotgan ikki ayol va soliq boshqarmasi xodimlari o‘rtasida janjal sodir bo‘lgani xabar qilingandi. Viloyat soliq boshqarmasi holat yuzasidan maʼlumot berdi.
Qayd etilishicha, joriy yilning 12 mart kuni Uzun tumani soliq inspeksiyasi xodimlari tomonidan tumanning “Bahoriston” mahallasi hududida savdo qilish uchun belgilanmagan joylarda noqonuniy faoliyatning oldini olishga qaratilgan tadbirlar belgilangan tartiblarga asosan o‘tkazilgan.
Tadbir davomida mutasaddilar tomonidan ko‘p marotaba ogohlantirishlarga qaramay, qonunga zid hamda antisanitariya holatida savdo faoliyatini davom ettirib kelayotgan fuqarolar Sh.T. hamda S.T. soliq inspeksiyasi xodimi F.Ergashevning noqonuniy savdo faoliyatini rasmiylashtirish talabiga qarshilik ko‘rsatib, janjal ko‘tarishgan va davlat xizmatchisini obro‘sizlantirishga harakat qilishgan.
Holat yuzasidan Jinoyat ishlari bo‘yicha Uzun tumani sudining qaroriga asosan Sh.T. hamda S.T.ga nisbatan maʼmuriy tartibda chora ko‘rilgan.
