O‘zbekistonda yomg‘ir suvidan isteʼmol uchun foydalanish taklif etildi
Bu bo‘yicha Ekologik partiya dastur ishlab chiqmoqchi.
"O‘zbekiston Ekologik partiyasi mamlakatda yomg‘ir suvidan foydalanish tizimini joriy etish dasturini qabul qilishni taklif qilmoqda. Partiyamiz bu borada takliflar ishlab chiqib, hukumatga taqdim etadi", — deyiladi xabarda.
Maʼlumotlarga ko‘ra, birgina Markaziy Osiyoda so‘nggi 50-60 yil ichida muzliklar maydoni qariyb 30 foizga qisqargan, O‘zbekiston esa suv tanqisligidan aziyat chekayotgan davlatlar reytingida 25-o‘rinni egallagan.
Ekologik partiya to‘g‘ri tozalangan yomg‘ir suvi turli ishlab chiqarish jarayonlarida qayta foydalanish uchun maʼlum talablarga javob beradi deb hisoblaydi.
“Mutaxassislarning fikricha, yomg‘ir suvidan foydalangan holda bir kishi kuniga o‘rtacha 71 litrgacha ichimlik suvini tejashi mumkin”, — deya qo‘shimcha qildi matbuot xizmati.
O‘zbekiston Suv xo‘jaligi vazirligi maʼlumotlariga ko‘ra, suv tanqisligi tufayli respublikada so‘nggi paytlarda yillik suv isteʼmoli o‘tgan asrning 80 yillaridagi 64 milliard kub metrdan 51-53 milliard kub metrgacha kamaygan. Respublikada bir kishi boshiga suvning solishtirma isteʼmoli yiliga 1,56 ming kub metrgacha kamaydi, aholi soni esa yillar davomida 15 million kishidan 2023 yilda 36,8 million kishiga o‘sdi.
