Namanganda salkam 10 ming dollar soxta pul aniqlandi
Ular Qirg‘iz Respublikasidan olib kelingan.
Davlat xavfsizlik xizmati tomonidan tezkor tadbirda qalbaki xorijiy valyutalarni muomalaga chiqarishga uringan shaxslar ushlandi.
Xususan, “Namangan-Toshkent” yo‘nalishida harakatlanayotgan, Toshkent viloyatining Chinoz tumanida yashovchi, 1978 yilda tug‘ilgan shaxs boshqaruvidagi «Honda» rusumli avtomashina Pop tumani hududida to‘xtatilib, ko‘zdan kechirilganda, unda qalbaki 4 ming AQSH dollari borligi maʼlum bo‘ldi.
Tergovga qadar tekshiruv davomida, u mazkur qalbaki valyutalarni kelgusida sotish maqsadida Yangiqo‘rg‘on tumanida yashovchi, 1971 yilda tug‘ilgan, muqaddam sudlangan fuqarodan 2200 AQSH dollariga sotib olganligi aniqlandi.
So‘ngra tezkor tadbir davom ettirilib, Yangiqo‘rg‘on tumanida yashovchi fuqaro qalbaki 5400 AQSH dollarini haqiqiy 3 ming AQSH dollariga ayirboshlagan vaqtida ushlandi.
Aniqlanishicha, u qalbaki valyutalarni Qirg‘iz Respublikasidagi jinoiy sheriklaridan olib kelgan. O‘tkazilgan tezkor tadbir natijasida jami qalbaki 9400 AQSH dollari ashyoviy dalil sifatida olindi.
