Buxorodagi g‘isht zavodida ishchi vafot etdi
Hodisa yuzasidan komissiya tuzildi.
Buxoro viloyati G‘ijduvon tumanidagi shlakablok g‘isht ishlab chiqaradigan zavodda ishchi baxtsiz hodisa qurboni bo‘ldi. Bu haqda Buxoro viloyati Kambag‘allikni qisqartirish va bandlik boshqarmasi buyrug‘ida maʼlum qilindi.
Unda maʼlum qilinishicha, 1976 yilda tug‘ilgan G‘.Q. “Howo” tirkamasidagi sementni tushirayotgan vaqtida tirkama borti tushib ketishi oqibatida og‘ir jarohat olgan va vafot etgan.
Hodisa yuzasidan bandlik boshqarmasi tashabbusi bilan komissiya tuzilgan, u baxtsiz hodisani tekshirib, tegishli tartibda rasmiy idoralarga taqdim etishi belgilangan.
Eslatib o‘tamiz, avvalroq Toshkent viloyatida ham ikki nafar ishchi baxtsiz hodisa oqibatida vafot etgandi.
