Futbol bo‘yicha Yevropa chempionati uchun 11 yevrolik tanga chiqarildi
Noyob tanga 111 111 dona tirajga ega bo‘lib, 8 maydan sotuvga chiqariladi.
Germaniyaning o‘nta shahrida bo‘lib o‘tadigan futbol bo‘yicha bo‘lajak Yevropa chempionati nafaqat muxlislar, balki kolleksionerlarni ham xursand qiladi.
Bu yil futbol bo‘yicha Yevropa chempionati Germaniyada 14 iyundan 14 iyulgacha bo‘lib o‘tadi.
Shu munosabat bilan Germaniya hukumati tarixda birinchi marta Germaniya futbol assotsiatsiyasi bilan birgalikda esdalik kumush tanga chiqarmoqda. Bir tomonda nemis burguti, ikkinchi tomonda turnir finali bo‘lib o‘tadigan Berlindagi Olimpiya stadionining tomi joylashgan.
Tanganing og‘irligi 14 gramm, diametri esa 30 millimetrga teng. Nominal qiymati – 11 yevro – futbol jamoasidagi o‘yinchilar soniga teng.
U 111 111 dona tirajga ega bo‘lib, 8 maydan sotuvga chiqariladi. Ammo hoziroq oldindan buyurtma berish mumkin.
