Surxondaryoda fuqaro tergovda tok bilan qiynoqqa solindimi?
Tarmoqda tarqalgan xabarlarga izoh berildi.
Ijtimoiy tarmoqda fuqaro tergovchilar tomonidan elektr toki bilan qiynagani haqida xabar tarqaldi.
Aniqlanishicha, Boysun tumanida yashovchi fuqaro A.A. o‘zining murojaatida jiyani M.A.ni joriy yilning 10 yanvar kuni tuman IIB xodimlari urib tan jarohati yetkazganligini maʼlum qilgani holati yuzasidan tuman prokuraturasi tomonidan tergovga qadar tekshiruv harakatlari o‘tkazilgan.
Tergovga qadar tekshiruv davomida fuqaro M.A.ning 10.01.2024 yilda tuman IIB binosiga kirib chiqqanligi tegishli tartibda qayd qilinganligi, uning kelishi va binoni tark etishi hamda so‘rov-suhbatxonasida suhbat o‘tkazish jarayonlari tushirilgan video tasvir protsessual tartibda rasmiylashtirib olinib, ko‘zdan kechirilganda, fuqaro M.A. sog‘lom holatda kelib, sog‘lom holatda IIB binosini tark etganligi aniqlangan.
Shuningdek, viloyat IIB tomonidan holat bo‘yicha o‘tkazilgan idoraviy xizmat tekshiruvi xulosasiga ko‘ra, tuman IIB xodimlarining harakatlarida qonunbuzilishi holatlari aniqlanmagan.
Bundan tashqari, sud-tibbiy ekspertiza tekshiruvi davomida fuqaro M.A.ning badanidagi yengil tan jarohati yetkazilgan vaqti fuqaro bayon qilgan vaqtga mos kelmasligi ko‘rsatib o‘tilgan.
Tergovga qadar tekshiruv natijasiga ko‘ra, biror-bir shaxsning harakatlarida jinoyat tarkibi aniqlanmaganligi sababli JPKning 83-moddasi 2-bandiga asosan jinoyat ishi qo‘zg‘atishni rad etish haqida qaror qabul qilingan.
