“Antistrumin” ishlab chiqaruvchi korxona litsenziyasi to‘xtatildi
Mazkur dori sabab Namanganda zaharlanish holati yuz bergandi.
O‘zbekistonda “Antistrumin” dori vositasini ishlab chiqargan “Samo” MCHJ korxonasi litsenziyasi vaqtinchalik to‘xtatildi. Bu haqda Farmatsevtika mahsulotlari xavfsizligi markazi xabar berdi.
O‘rganishlar natijasiga ko‘ra, korxona tomonidan qo‘pol qonunbuzilish holatiga yo‘l qo‘yilgani aniqlanib, 2023 yil dekabrida “Samo” MCHJ litsenziyasini bekor qilish to‘g‘risida markaz tomonidan sudga daʼvo arizasi kiritilgan.
Namanganda yuz bergan zaharlanish holati yuzasidan qo‘zg‘atilgan jinoyat ishi bo‘yicha surishtiruv-tergov harakatlari olib borilayotgani sababli mazkur iqtisodiy ish bilan bog‘liq sud, Bosh prokuraturaning Iqtisodiy jinoyatlar va korrupsiyaga qarshi kurash boshqarmasi iltimosnomasiga ko‘ra 2024-yil 19 yanvarda to‘xtatilgan.
Aholining hayoti hamda sog‘lig‘i uchun tahdid yuzaga kelishining oldini olish maqsadida, Farmatsevtika mahsulotlari xavfsizligi markazining yuqoridagi iqtisodiy ish bo‘yicha yakuniy sud hujjati qabul qilinguniga qadar “Samo” MCHJning litsenziyasini to‘xtatib turish to‘g‘risida Zangiota tumanlararo iqtisodiy sudiga kiritgan iltimosnomasi sudning tegishli ajrimiga muvofiq qanoatlantirilgan.
