Samarqandda kuchli yomg‘ir sabab ko‘prik qulab tushdi
Holat yuzasidan hokimlik maʼlumot berdi.
Samarqand viloyati Urgut tumanida kuzatilgan kuchli yog‘ingarchilik oqibatida Uzunsoy mahallasidagi ko‘prik qulab tushdi.
Hokimlikning maʼlum qilishicha, ayni kunlarda hududlarda kuzatilayotgan mavsumiy yog‘ingarchilik oqibatida soyning qirg‘oq qismi yuvilishi natijasida ko‘prik ustidagi yuk ko‘taruvchi konstruksiyalar pastga qulab tushgan. Soydan hech qanday kuchli sel oqimi oqib kelmagan va atrofdagilarga zarar yetmagan.
"Hozirda tuman hokimligi tashabbusi bilan ko‘prikni qayta tiklash ishlari yo‘lga qo‘yilgan bo‘lib, aholiga qisqa fursatlarda foydalanishga topshirish maqsadida amaliy ishlar olib borilmoqda" - deyiladi xabarda.
Maʼlumot o‘rnida, ushbu ko‘prik 1974 yillarda mahalliy aholi tomonidan hashar yo‘li bilan qurilgan.
