Nigeriyada o‘g‘irlangan 200 dan ortiq bola ozod qilindi
Bu haqda Kaduna shtati gubernatori Uba Sani maʼlum qildi.
Nigeriya shimolidagi bir taʼlim muassasasidan o‘g‘irlab ketilgan 200 dan ortiq bola armiya tomonidan olib borilgan operatsiya natijasida ozod qilindi.
Reuters xabariga ko‘ra, gubernator harbiylarga “jinoyatchilikni to‘xtatish va jamoat tartibini tiklash” imkonini bergan jasorati va qatʼiyati uchun minnatdorchilik bildirdi.
Joriy yilning 7 mart kuni ertalab Kuriga qishlog‘ida o‘quvchilarning umumiy yig‘ilishi chog‘ida davlat maktabiga hujum uyushtirilgandi. Bu Nigeriyada so‘nggi yillarda sodir bo‘lgan eng yirik odam o‘g‘irlashlardan biri edi.
Bungacha, 2014 yilda Nigeriya shimolidagi Chibok shahrida “Boko haram” terrorchilik guruhi 276 nafar o‘quvchi qizni o‘g‘irlab ketgan edi. 2021 yilga kelib ularning 100 dan ortig‘i bedarak yo‘qolgan. Save the Children tashkiloti Nigeriyada 2021 yil yanvar oyidan avgust oyigacha bo‘lgan davrda 1000 dan ortiq bola o‘g‘irlab ketilganini aytdi.
Nigeriya prezidenti Bola Tinubu xavfsizlikni taʼminlash va maktab o‘quvchilari uchun qidiruv-qutqaruv operatsiyasiga yordam berish uchun qo‘shimcha kuchlarni yuborishni buyurdi. 23 martda Sokoto shtati gubernatori maktab matbuot kotibi Liman Abubakarga ko‘ra, o‘g‘irlab ketuvchilar talab qilgan to‘lov to‘lanmagan bo‘lsa-da, 17 nafar maktab o‘quvchisi qo‘yib yuborilganini maʼlum qildi.
