Andijonda alimentdan qarzdor ona jinoiy javobgarlikka tortildi

Andijon viloyatida farzandlarining moddiy taʼminotidan bo‘yin tovlab kelgan ayol jinoiy javobgarlikka tortildi. Bu haqda Oliy sud matbuot xizmati xabar berdi.

 

Maʼlum bo‘lishicha, Yo.D. bir necha yil muqaddam fuqaro Qobiljon Dolimov bilan qonuniy nikohdan o‘tib, turmush qurgan.

 

2007 yilda qizi M.Q., 2010 yilda esa o‘g‘li M.Q. tug‘ilgan. Ammo vaqt o‘tishi bilan er-xotinning o‘rtasiga sovuqchilik tushib, 2016 yilda ajrashib ketishadi. Shundan so‘ng ayol jigarbandlarini xo‘jayiniga tashlab ketadi.

 

Erkak ayolidan aliment undirish maqsadida fuqarolik ishlari bo‘yicha Uchqo‘rg‘on tumanlararo sudiga ariza bilan murojaat qiladi. Sudning 2016 yil 13 oktyabrdagi sud buyrug‘iga asosan onadan sobiq xo‘jayini foydasiga 2 nafar voyaga yetmagan farzandlarining moddiy taʼminoti uchun har oylik daromadining 1/3 qismi miqdorida aliment undirish belgilanadi.

 

Lekin ayol boshqa shaxs bilan turmush qurib, yana 3 nafar farzandli bo‘ladi. 2022 yilga kelib, uning alimentdan qarzdorligi 85 million 896 ming so‘mga yetadi. Oqibatda 2022 yil 15 dekabrda jinoyat ishlari bo‘yicha Andijon shahar sudining qaroriga asosan Maʼmuriy javobgarlik to‘g‘risidagi kodeksning 47-4-moddasi bilan bazaviy hisoblash miqdorining bir baravari – 300 ming so‘m miqdorida jarima jazosiga tortiladi.

 

Ammo Yo.D. shunda ham o‘ziga tegishli xulosa chiqarmay, 2023 yil 13 apreldan 2023 yil 1 dekabrga qadar alimentni to‘lamaydi.

 

Yaqinda mazkur holat jinoyat ishlari bo‘yicha Andijon shahar sudida ko‘rib chiqildi. Sud Yo.D.ni Jinoyat kodeksining 122-moddasi 1-qismi bilan aybdor deb topib, bazaviy hisoblash miqdorining 5 baravari – 1 million 700 ming so‘m jarima jazosiga mahkum etdi. Shuningdek sud hukmida sudlanuvchidan Q.D. foydasiga 15 million 677 ming so‘m aliment pullarini undirish ham belgilandi.