Fransiyada ofitsiantlar poygasi o‘tkazildi
Homiylar poyga uchun 100 ming yevro ajratishdi.
24-mart kuni uzoq yillik tanaffusdan so‘ng ilk marta Parij shahrida ofitsiantlar o‘rtasida musobaqa bo‘lib o‘tdi. Unda 200 ga yaqin erkak va ayol qatnashdi.
Poyga shartlariga ko‘ra, ishtirokchilar bir stakan suv va chaska qo‘yilgan patnisni yiqitib yubormagan holda 2 kilometr masofani bosib o‘tishlari kerak. Poygada yugurish mumkin emas, biroq tez yurishga ruxsat etiladi.
Maʼlumot uchun, ushbu tadbir 1914 yildan buyon o‘tkazib kelinadi. Bir necha o‘n yillar davomida ushbu tanlovga Parij gazetalaridan biri homiylik qilgan. Anʼana 2012 yilda mablag‘ yetishmasligi tufayli to‘xtatilgan.
Bu yil Parij meriyasi va shahar suv boshqarmasi ko‘magida musobaqa qayta tiklandi. Ular poyga uchun 100 ming yevro ajratishdi.
Tadbir yakunida g‘oliblarga gastronomik ekskursiyalar va Parijdagi Olimpiadaning ochilish marosimiga yo‘llanmalar topshirilgan.
