O‘zbekistonga Rossiyadan gaz yetkazib berish uch baravar oshiriladi
Rossiya gazining tashish hajmini 2024-yilda 3,8 milliard kub metrga oshirish belgilanmoqda.
O‘zbekistonga 2024-yilda Qozog‘iston orqali Rossiya gazini yetkazib berish hajmi 2023-yilga nisbatan qariyb uch barobar ortadi.
“Gazprom” va Qozog‘iston hukumati o‘rtasida imzolangan strategik hamkorlik to‘g‘risidagi bitim doirasida Rossiya gazining O‘zbekistonga yillik tashish hajmini 2023-yildagi 1,28 milliard kub metrdan 2024-yilda 3,8 milliard kub metrga oshirish belgilandi, — deyiladi xabarlarda.
2023-yil 7-oktabrdan O‘zbekiston Qozog‘iston hududi orqali “Markaziy Osiyo — Markaz” gaz quvurida Rossiyadan gaz importini boshlagan edi. UzGasTrade va “Gazprom eksport” MCHJ o‘rtasidagi ikki yillik shartnomaga ko‘ra, kuniga 9 million kub metr yoki yiliga qariyb 2,8 milliard kub metr gaz yetkazib berish ko‘zda tutilgan.
O‘zbekiston hukumatining “2024-yil I choragiga mo‘ljallangan investitsiya dasturini amalga oshirish chora-tadbirlari to‘g‘risida”gi qaroriga ko‘ra, 2024—2030-yillarda magistral gaz quvurlarini modernizatsiya qilish dasturi birinchi bosqichida 500 million dollar ajratish rejalashtirilgan. Shu orqali tabiiy gaz qabul qilishni kuniga 32 million kub metrgacha oshirish ko‘zda tutilgan.
