Toshkentda kuchli shamol sabab elektr avariyaviy o‘chdi
Ayrim hududlar gaz tarmog‘idan uzilib qolgan.
Toshkentda kuchli shamol sabab elektr tarmog‘ida avariyaviy uzilishlar kuzatildi. Bu haqda Energetika vazirligi xabar bermoqda.
Qayd etilishicha, soat 09:33 da qattiq shamol natijasida Toshkent shahrida 110 kVli «L-K-D» elektr uzatish tarmog‘i 60 MVt quvvat bilan avariyaviy o‘chgan.
Buning natijasida Toshkent viloyatining Piskent, Quyi Chirchiq va O‘rta Chirchiq tumanlarida istiqomat qiluvchi 12 ming 550 ta isteʼmolchi, shuningdek, kichik ishlab chiqarish sanoat korxonalari elektr taʼminotidan uzilgan.
Hozirgi vaqtda isteʼmolchilarni boshqa manbalardan taʼminlash choralari ko‘rilyapti.
Soat 10:20 da Toshkent shahri Chilonzor tumani 19-kvartal, Xirmontepa mahallasida diametri 50 mm bo‘lgan past bosimli gaz quvuri katta daraxt shamol oqibatida ildizidan qo‘porilib tushgani bois uzilgan. Natijada ushbu hududdagi 16 ta ko‘p qavatli uyning 768 ta xonadoni tabiiy gazdan vaqtincha uzilgan.
Ayni paytda maxsus brigadalar tomonidan ushbu nosozliklar bartaraf etilmoqda.
