Toshkentda yangi qurilayotgan “dom”ning devori shamolda qulab tushgani aytildi
Holatga Qurilish va uy-joy kommunal xo‘jaligi vazirligi izoh berdi.
Videoda keltirilgan holat Toshkent shahri Yakkasaroy tumani KXAY ko‘chasi 2/1-uy manzilida joylashgan buyurtmachi “AL-HUSN” XK tomonidan yer to‘laga ega sakkiz qavatli ofis va umumovqatlanish binosi qurilishida sodir bo‘lgan.
Hududiy inspeksiya tomonidan joyiga chiqib o‘rganilganda qurilish-montaj ishlarining ko‘p yillar davomida moliyaviy sabablarga ko‘ra to‘xtatib turilgani va hozirda obyektda qurilish ishlarini davom ettirishga tayyorgarlik ko‘rish jarayonlari kechayotgani aniqlandi.
Yollanma ishchilar tomonidan obyekt devorlarini demontaj qilish paytida ehtiyotsizlikka yo‘l qo‘yilishi oqibatida beton bo‘laklaridan biri qurilish maydonidan tashqariga tushgan.
Mazkur holat yuzasidan qurilish-montaj ishlarini loyiha va qurilishda texnika xavfsizligi talablari asosida olib borilishi bo‘yicha masʼul shaxslarga tegishli ko‘rsatma va tushuntirishlar berib o‘tildi.
