Turkiyada ISHIDga aloqador 51 kishi ushlandi
Bu bo‘yicha 21 ta viloyatda operatsiya o‘tkazilgan.
Turkiya maxsus xizmatlari 51 kishini “Islomiy davlat” guruhiga aloqadorlikda gumon qilib qo‘lga oldi. Bu haqda Turkiya Ichki ishlar vazirligi rahbari Ali Erlikaya maʼlum qildi.
“21 viloyatda to‘rt kun davomida o‘tkazilgan amaliyotlar doirasida ISHID terrorchilik tashkiloti bilan aloqadorlikda gumon qilinib, 51 kishi qo‘lga olindi”, — deb yozdi vazir X ijtimoiy tarmog‘ida.
Ichki ishlar vazirligi rahbarining so‘zlariga ko‘ra, qo‘lga olinganlarning aksariyati Anqarada (o‘n kishi) bo‘lgan. Tintuvlar davomida guruh faoliyatiga oid hujjatlar va raqamli axborot vositalari musodara qilindi.
Eslatib o‘tamiz, yanvar oyida “Islomiy davlat” guruhi Istanbuldagi cherkovga uyushtirilgan va bir kishi halok bo‘lgan hujum uchun javobgarlikni o‘z zimmasiga olgandi. «Anadolu» agentligi maʼlumotlariga ko‘ra, 3 yanvar kuni Turkiya bo‘ylab cherkov va sinagogalarga hujum uyushtirganlikda gumon qilingan 25 nafar guruh aʼzosi hibsga olingan.
