Andijonda tadbirkorning murojaatini vaqtida ko‘rmagan bank xodimi jazolandi
Maʼlum bo‘lishicha, MCHJ rahbari mulklarini garovdan chiqarib berishni so‘rab unga bankka murojaat qilgan.
Andijon tumanida faoliyat yurituvchi MCHJ rahbari mulklarini garovdan chiqarib berishni so‘rab “Ipoteka-bank” ATIB Andijon viloyat filialiga murojaat qilgani, lekin murojaatni ko‘rib chiqish muddatlariga rioya qilinmaganidan shikoyat qilib Biznes-ombudsmanga murojaat qilgan.
Shunga ko‘ra Vakil devoni xodimlari tomonidan bankning mansabdor shaxsiga nisbatan MJtKning 43-moddasi bilan maʼmuriy bayonnoma rasmiylashtirilib, jarima tayinlash to‘g‘risida qaror qabul qilindi.
Maʼlum qilinishicha, qonunchilikda ariza yoki shikoyat masalani mazmunan hal etishi shart bo‘lgan davlat organiga, tashkilotga yoki ularning mansabdor shaxsiga kelib tushgan kundan eʼtiboran 15 kun ichida, qo‘shimcha o‘rganish va (yoki) tekshirish, qo‘shimcha hujjatlarni so‘rab olish talab etilganda esa, 1 oygacha bo‘lgan muddatda ko‘rib chiqiladi.
Taklif davlat organiga, tashkilotga yoki ularning mansabdor shaxsiga kelib tushgan kundan eʼtiboran 1 oygacha bo‘lgan muddatda ko‘rib chiqiladi, qo‘shimcha o‘rganishni talab etadigan takliflar bundan mustasno bo‘lib, bu haqda taklifni kiritgan jismoniy yoki yuridik shaxsga 10 kunlik muddatda yozma shaklda xabar qilinadi.
