Namanganda inson buyragini sotmoqchi bo‘lgan shaxs ushlandi
U buyrak evaziga 4 ming dollar berishni aytgan.
Namangan viloyatida inson buyragini 4 ming dollarga sotmoqchi bo‘lgan shaxs ushlandi. Bu haqda viloyat IIB xabar berdi.
Qayd etilishicha, viloyatning Kosonsoy tumanida yashovchi shaxs Andijonning Buloqboshi tumanida yashovchi fuqaro bilan gaplashib, uning bir buyragini sotib berishga kelishgan.
Kelishuvga ko‘ra, ular Tojikistonga borishi va jarrohlik amaliyoti o‘sha yerda o‘tkazilishi kerak bo‘lgan. U buyrak evaziga $4 ming berishni aytgan.
Ushbu shaxs fuqaroni qalbaki tug‘ilganlik to‘g‘risidagi guvohnoma va boshqa hujjatlar bilan Toshkentga olib kelayotgan vaqtida Namangan viloyati huquqni muhofaza qiluvchi organ xodimlari tomonidan qo‘lga olingan.
Mazkur holat yuzasidan Pop tumani IIB huzuridagi tergov bo‘linmasi tomonidan Jinoyat kodeksining tegishli moddalari bilan jinoyat ishi qo‘zg‘atilib, hozirda dastlabki tergov harakatlari olib borilmoqda.
