O‘zbekiston internet resurslariga 3 milliondan ortiq kiberhujum uyushtirildi
Kiberxavfsizlik markazi 2024-yil 1-chorak monitoring jarayoni natijalarini eʼlon qildi.
Monitoring jarayonida davlat organlari va tashkilotlarning 19 ta veb-resurslarida 70 ta zaiflik va kamchiliklar aniqlanib, bartaraf etildi.
“Kiberxavfsizlik markazi” xabariga ko‘ra, ushbu vaqt mobaynida internet tarmog‘ining milliy segmentida 3 million 290 mingdan ortiq kiberhujumlar kuzatilgan.
Kibermakonda mavjud zaifliklar va tahdidlar to‘g‘risidagi maʼlumotlarni aniqlash, to‘plash va ularni bartaraf etish bo‘yicha chora ko‘rish maqsadida, markazning monitoring tizimlari orqali davlat organlari va boshqa tashkilotlarning axborot infratuzilmalarida aniqlangan 369 ming 660 dan ortiq kibertahdidlar bo‘yicha maʼlumotlar tegishli tashkilotlarga taqdim etilgan.
Kiberxavfsizlik talablariga rioya etilmagani sababli so‘nggi 3 oy mobaynida UZ domen zonasida joylashgan 45 ta veb-saytda kiberxavfsizlik hodisasi aniqlandi. Shulardan, 12 tasi davlat organlariga qolgan 33 tasi xususiy sektorga tegishli.
