Toshkentda rektorlar forumi boshlandi
Unda 100 ga yaqin OTM rahbarlari qatnashmoqda.
Toshkentda O‘zbekiston-Tojikiston oliy taʼlim muassasalari rektorlarining II forumi o‘z ishini boshladi.
O‘zbekiston Respublikasi Oliy taʼlim, fan va innovatsiyalar vazirligi tomonidan tashkil etilgan ushbu xalqaro anjuman "2030 yil: O‘zbekiston va Tojikistonda oliy taʼlim va ilm-fanni rivojlantirishning ustuvor yo‘nalishlari" mavzusiga bag‘ishlandi.
Unda ikki tomondan 100 ga yaqin oliy taʼlim muassasalari rahbarlari, vazirlik hamda idoralar masʼullari ishtirok etmoqda.
Anjuman davomida universitetlarning fan va taʼlim integratsiyasi, ilmiy tadqiqotlar yaqinlashuvi borasidagi O‘zbekiston va Tojikiston tajribasi muhokama qilinib, taʼlim sifatini taʼminlash, bilimlarni baholash va samarali boshqaruv masalalari bo‘yicha tajriba almashilmoqda. Shuningdek, O‘zbekiston va Tojikiston oliy taʼlim muassasalari o‘rtasidagi xalqaro aloqalar xususiyatlari bo‘yicha fikrlar tinglanib, hamkorlikdagi istiqbolli rejalar ko‘rib chiqilmoqda.
Forum yakunida oliy taʼlim, ilm-fan sohalarida hamkorlikni mustahkamlash, o‘zaro tajriba almashinuvni kengaytirish va manfaatli aloqalarning boshqa dolzarb yo‘nalishlari bo‘yicha 50 dan oshiq anglashuv memorandumi, bitim va "Yo‘l xaritalari" imzolanishi rejalashtirilgan.
