“Tolibon” O‘zbekiston neftini ortiga qaytargani aytildi
Bojxona qo‘mitasi tarmoqlarda tarqalgan xabarga munosabat bildirdi.
Maʼlum qilinishicha, ijtimoiy tarmoqlarda Afg‘oniston sifati past bo‘lgani uchun 120 tonna neft mahsulotlarini O‘zbekistonga qaytarib yuborganiga doir xabarlar tarqalmoqda. Ammo, bunda voqelik biroz noto‘g‘ri talqin qilinmoqda.
"Gap shundaki, qaytarib yuborilgan neft mahsulotlari O‘zbekistonga tegishli tovar emas. Aksincha, 2 ta sisternaga ortilgan 120 tonna benzin Afg‘onistonga Rossiyadan yuborilgan va mamlakatimiz hududidan tranzit tarzida harakatlangan, xolos.
Afg‘oniston tomoni ushbu yoqilg‘ini qaytarib yuborgani sababli sisternalar 2024 yil 6 aprel kuni “Ayritom” chegara bojxona posti orqali O‘zbekistonga kirib kelgan.
Shu o‘rinda ommaviy axborot vositalaridan ikkala mamlakat o‘rtasidagi do‘stona munosabatlarni inobatga olib, bu kabi axborotlarni tarqatishdan oldin sinchiklab o‘rganishlarini so‘raymiz.
Bojxona qo‘mitasi Matbuot xizmati bojxona organlari faoliyatiga doir axborotlarning xolisligi va haqqoniyligini taʼminlashda keng jamoatchilik va ommaviy axborot vositalari vakillari bilan o‘zaro hamkorlikka tayyor ekanini maʼlum qilamiz", — deyiladi munosabatda.
