Surxondaryoda attraksion trosi uzilib ketdi: 4 kishi jarohatlandi
Sanoat xavfsizligi qo‘mitasi attraksion mavsum oldidan sinovdan o‘tkazilmaganini bildirdi. Shuningdek, voqea yuzasidan Bosh prokuratura matbuot kotibi Hayot Shamsutdinov Zamon.uz'ga qo‘shimcha maʼlumot taqdim etdi.
16 aprel kuni Surxondaryo viloyati Termiz shahridagi istirohat bog‘ida attraksion trosi uzilib ketishi oqibatida 4 kishi jarohatlandi. Bu haqda Tog‘-kon, geologiya va sanoat xavfsizligini nazorat qilish qo‘mitasi xabar berdi.
"Attraksion mavsum oldidan to‘liq texnik shahodat sinovlaridan o‘tkazilmagan. Uni tayyorlash va texnik tekshiruvdan o‘tkazish uchun masʼul shaxs tayinlanmagan, mavsumga tayyorligi to‘g‘risidagi dalolatnoma ham tuzilmagan", — deyiladi qo‘mita xabarida.
Qo‘mitaning qo‘shimcha qilishicha, ruxsat etish xususiyatiga ega hujjatni berish yoki berishni rad etish to‘g‘risidagi qarorni qabul qilish uchun tashkilotning istirohat bog‘lari attraksionlarini nazorat qilish bo‘limi tomonidan joyiga chiqib o‘rganiladi.
Bosh prokuratura matbuot kotibi Hayot Shamsutdinovning Zamon.uz‘ga maʼlum qilishicha, ushbu holat shaharning At-Termiziy ko‘chasida joylashgan Termiz avenue park MCHJga qarashli Bolajon madaniyat va istirohat bog‘ida sodir bo‘lgan. Hodisa oqibatida 4 nafar — 11 va 15 yoshli qizlar hamda 27 va 29 yoshli ayollar jarohatlangan.
Ulardan 2 nafari Qozog‘iston fuqarolari bo‘lgan. Jarohatlanganlar Respublika shoshilinch tibbiy yordam ilmiy markazi Surxondaryo filialiga yotqizilgan.
Hozirda holat yuzasidan Termiz shahri IIB huzuridagi tergov bo‘limi tomonidan tergovga qadar tekshiruv harakatlari olib borilmoqda.
