O‘zbekistonda energiya tarmog‘iga ajratilgan mablag‘larni ochiqlash taklif etildi
Deputat Bobur Bekmurodov bu bo‘yicha o‘z fikrlarni bildirdi.
Avvalroq Hukumat qarori bilan aholi uchun elektr energiyasi va tabiiy gaz taʼminoti isteʼmolining bazaviy meʼyorlari tasdiqlangani xabar qilingandi.
Oliy Majlis Qonunchilik palatasi deputati Bobur Bekmurodov “tabaqalashtirilgan tariflar” sabab boylar o‘z xarajatlari uchun davlat byudjetidan dotatsiya olmasligi kerakligi haqida yozdi.
Uning yozishicha, O‘zbekistonda elektr energiyasi isteʼmoliga to‘lovlar uning tannarxiga mos kelmaydi, oradagi tafovut davlat byudjetidan subsidiyalar hisobiga qoplanadi. Bunday yondashuv fuqarolarning moddiy imkoniyatidan qatʼi nazar, butun aholi uchun qo‘llaniladi.
“Energiya resurslarining jiddiy tanqisligi sharoitida moddiy taʼminlangan fuqarolar xarajatlari uchun davlat byudjetidan dotatsiya olmasligi kerak, deb hisoblaymiz”, — deydi u.
Energetika vazirligi hisob-kitoblariga ko‘ra, hozir aholining 15 foizi oyiga 300 kVt/soatdan ortiq elektr energiyasini isteʼmol qiladi. 75 foiz aholining isteʼmoli esa 200 kVt/soatdan oshmaydi. O‘zbekistonning energetika tarmog‘i tub islohotlarga muhtoj, shu munosabat bilan tariflarni o‘zgartirish va bozor mexanizmlarini joriy etish zarurligini taʼkidladi Bobur Bekmurodov.
Bobur Bekmurodov masʼul vazirlik va idoralarni quyidagilarni inobatga olishga chaqiradi:
-
Qaror ijrosi doirasida markaziy isitish tizimi va tabiiy gazdan foydalanish imkoni yo‘q hududlardagi sharoitlarni hamda asosiy issiqlik manbalari pechka va konditsionerlar ekanligini hisobga olish zarur;
-
Energetika vazirligi yuqori kuchlanish bo‘lganda maishiy texnikalariga zarar yetgan isteʼmolchilarga kompensatsiya to‘lash mexanizmlarini ishlab chiqishi zarur;
-
Hukumat davlat byudjetidan energiya tarmog‘ini modernizatsiya qilishga ajratilgan mablag‘larning ochiqligi va shaffofligini taʼminlashi kerak;
-
Xorijiy tajribani o‘rganish ham muhim. Masalan, differensiyalangan tariflar qo‘llaniladigan mamlakatlarda elektr energiyasiga talab yuqori bo‘lgan paytlarda (anomal havo sharoitlarida) tarif normalari sezilarli darajada oshiriladi.
