O‘zbekiston Qozog‘istonga insonparvarlik yordamini yubordi
Yordam yuklari suv toshqinlari oqibatida zarar ko‘rgan aholiga yetkaziladi.
Shavkat Mirziyoyevning topshiriqlariga muvofiq Qozog‘istonda yuz bergan suv toshqinlari oqibatida zarar ko‘rgan aholiga insonparvarlik yordami yuborildi. Bu haqda bosh vazir matbuot kotibi xabar berdi.
Qayd etilishicha, insonparvarlik yordami yukini shakllantirish hamda belgilangan manzilga yetkazib berish bilan bog‘liq tashkiliy masalalarga qaratilgan Vazirlar Mahkamasining farmoyishi qabul qilingan.
Insonparvarlik yordami yukini O‘zbekiston prezidentining maslahatchisi Tursinxon Xudaybergenov boshchiligidagi ishchi guruh Qozog‘istonga yetkazib beradi.
15 ta katta yuk hajmli avtoulovlardagi insonparvarlik yordamida oziq-ovqat mahsulotlari, ayollar, bolalar va erkaklar ust-bosh kiyim-kechaklari, ko‘rpacha, yoping‘ich, yostiqlar, gigiyenik vositalar, maxsus qurilmali chodirlar, rezina qayiq to‘plamlari va boshqa zarur mahsulotlar o‘rin olgan.
Ma'lumot uchun, aprel oyi boshida Qozog‘iston viloyatlarida suv toshqinlari yuz berdi. 17-aprelga qadar mamlakatning bir qancha hududlarida evakuatsiya e’lon qilindi. 18-aprel holatiga ko‘ra respublikaning beshta viloyatida 5,7 ming turar joy binosi va 1,1 ming tomorqa yerlari suv ostida qolgan. Mamlakatda suv toshqinlari oqibatida 7 kishi halok bo‘lgan.
