Endi yo‘lning belgilanmagan joyidan o‘tganlar ham kameraga tushadi
Bu bo‘yicha Hukumat qarori qabul qilindi.
Kameralar endi yo‘lni belgilanmagan joydan kesib o‘tayotgan fuqarolarning huquqbuzarligini ham qayd etadi.
Hukumat qaroriga asosan, foto va video qayd etish tizimi piyodalarni o‘tkazmaslik va fuqarolarning yo‘lning belgilanmagan joydan kesib o‘tishi kabi qoidabuzarliklarni qayd etishi lozimligi belgilandi.
2024 yil 1 iyuldan boshlab yo‘l bo‘yida joylashgan maktablar oldida, kamida to‘rt tasmali yo‘llardagi piyodalar o‘tish joylarida, yo‘l-transport hodisalari o‘choqlarida, temir yo‘l kesishmalarida maxsus avtomatlashtirilgan foto va video qayd etish dasturiy-texnik vositalari Ichki ishlar vazirligining “Xavfsiz shahar” tizimlarini rivojlantirish markazi tomonidan “Xavfsiz yo‘l va xavfsiz piyoda” respublika jamg‘armasi mablag‘lari hisobidan bosqichma-bosqich o‘rnatiladi.
Bunda maxsus avtomatlashtirilgan foto va video qayd etish dasturiy-texnik vositalari O‘zbekiston Respublikasi Ichki ishlar vazirligi Jamoat xavfsizligi departamentining Yo‘l harakati xavfsizligi xizmati tomonidan belgilanadigan joylarga o‘rnatiladi.
Maxsus avtomatlashtirilgan foto va video qayd etish dasturiy-texnik vositalari o‘rnatiladigan joylar YHXX tomonidan yo‘l harakati qoidalari buzilishlari hamda yo‘l-transport hodisalarining tahlilidan kelib chiqib belgilanadi.
