Chinozda 15 yoshli qiz chuqurga tushib ketdi
FVV uning ahvoli haqida maʼlumot berdi.
Kecha, 28-aprel kuni Toshkent viloyatining Chinoz tumanida 15 yoshli qiz ehtiyotsizlik sabab chuqurga tushib ketdi. Bu haqda Favqulodda vaziyatlar vazirligi xabar bermoqda.
Qayd etilishicha, soat 19:36 da Chinoz tumani “Hamza” MFY Sh. Rashidov ko‘chasida istiqomat qiluvchi fuqaroning 15 yoshli qizi o‘z ehtiyotsizligi oqibatida hovlisidagi chuqurlikka tushib ketganligi va uni olib chiqishda amaliy yordam so‘rab, Chinoz tumani FV bo‘limiga tashvishli xabar kelib tushgan.
Qutqaruvchilar zudlik bilan aytilgan manzilga yetib borib, maxsus qutqaruv asbob-anjomlar yordamida qizni chuqurlikdan sog‘-salomat chiqarib olgan va psixologik hamda birinchi tibbiy yordam ko‘rsatish maqsadida tibbiyot xodimlariga topshirgan. Qizning ahvoli yaxshi bo‘lganligi sababli shifoxonadan uyiga javob berib yuborilgan. Hozirda uning ahvoli yaxshi.
