Rossiya Jizzaxda atom elektr stansiyasini quradi
Loyiha qiymati 11 milliard dollar teng.
“Rosatom”saytida eʼlon qilingan maʼlumotlarga ko‘ra, “Rosatom” va “O‘zatom” O‘zbekistonda birinchi atom elektr stansiyasini qurish bo‘yicha shartnomani yakunlamoqda.
AES loyihasi VVER-1200 tipidagi reaktorlar bilan jihozlangan ikkita energoblokni qurishni nazarda tutadi.
Ushbu turdagi reaktor “3+” avlodiga tegishli bo‘lib, xavfsizlik va samaradorlikning eng yuqori xalqaro standartlariga javob beradi.
“Rosatom” davlat korporatsiyasi O‘zbekistonda birinchi atom elektr stansiyasini qurish bo‘yicha pudratchi sifatida tanlangan.
“Jizzax viloyatida joylashgan Tuzkon ko‘li hududini tanlash muhandislik tadqiqotlari natijalariga ko‘ra aniqlandi, bu uning ushbu turdagi obyektni joylashtirish uchun yaroqliligini tasdiqladi”, — deyiladi xabarda.
Birinchi energiya blokining ishga tushirilishi 2030 yilda, ikkinchi blokning ishga tushirilishi esa 2033 yilda amalga oshirilishi rejalashtirilgan. Loyihaning dastlabki qiymati 11 milliard dollarga baholanmoqda.
Eslatib o‘tamiz, O‘zbekiston va Rossiya o‘rtasida stansiya qurilishini nazarda tutuvchi hamkorlik shartnomasi 2017 yil dekabrida imzolangan. O‘shandan beri ushbu shartnomani yakunlash orqaga surilib kelinayotgan edi.
2017 yildan so‘ng O‘zbekistonda “O‘zatom” Atom energetikasini rivojlantirish agentligi ham tashkil etildi.
