Buxoroda tarixiy yodgorliklar taʼmirlanishiga ajratilgan milliardlar “yeb yuborildi”
Buxoro mintaqaviy restavratsiya markazi mansabdor shaxslari va boshqalarga nisbatan jinoyat ishi qo‘zg‘atildi.
Bosh prokuratura xabariga ko‘ra, Buxoro shahridagi bir qator tarixiy yodgorliklar “Xo‘ja Kalon” masjidi, “Xusayni” va “Nodir Devonbegi” madrasalari hamda “Ark” majmuasi devorlarini restavratsiya va taʼmirlash ishlari bilan yaqindan tanishilgan.
O‘rganishda, ushbu yodgorliklarda bajarilgan ish hujjatlariga soxta yozuvlar kiritish yo‘li bilan restavratsiya va taʼmirlash ishlarida:
— “Xo‘ja Kalon” masjidida 731 million so‘m;
— “Xusayni” madrasasida 216 million so‘m;
— “Nodir Devonbegi” madrasasida 90 million so‘m;
— Buxoro shahri tarixiy markazi hududida joylashgan 74 ta obyektga manzil ko‘rsatgich belgilari o‘rnatish uchun ajratilgan 50 million so‘m byudjet mablag‘i talon-taroj qilingani aniqlandi.
Bundan tashqari, Buxoro mintaqaviy restavratsiya markazi mansabdor shaxslari tomonidan 2,3 milliad so‘m byudjet mablag‘i tovar-moddiy boyliklar sotib olish uchun sarflangani yuzasidan hujjatlar rasmiylashtirilib, amalda mablag‘lar talon-taroj qilingan.
O‘rganish natijasiga ko‘ra, Buxoro mintaqaviy restavratsiya markazi mansabdor shaxslari va boshqalarga nisbatan JKning 167-moddasi 3-qismi “a” bandi va 209-moddasi 2-qismi “a” bandi bilan jinoyat ishi qo‘zg‘atildi.
