Ekologiya inspektorlari brakonyerlar hujumiga uchradi
Ular xodimlarni suvga cho‘ktirmoqchi bo‘lgan.
29 aprel kuni Toshkent viloyati Ekologiya boshqarmasi Sirdaryo suv havzasi shoʻbasi inspektorlari Sirdaryo daryosining o‘ng qirg‘og‘ida nazorat tadbirlari o‘tkazayotganda brakonyerlar hujumiga uchradi.
Sirdaryo daryosining Oqqo‘rg‘on tumanidan oqib o‘tuvchi hududida inspektorlar nomaʼlum fuqarolar tomonidan taqiqlangan qurollar, yaʼni leskali to‘r, motorli qayiq yordamida baliq ovlanayotgani holatiga duch kelishadi. Sirdaryo suv havzasi sho‘basi boshlig‘i D. Zohidov va bosh davlat inspektori T. Bo‘riyev huquqbuzarlik holatiga chek qo‘yish maqsadida noqonuniy baliq ovlayotgan fuqarolarni yoniga qayiq bilan boradi. Ammo shu paytda huquqbuzarlar inspektorlarga hujum qilib, ularni suvga itarib yuborishadi.
Shuningdek, brakonyerlar inspektorlarni suvga cho‘ktirish maqsadida rezina qayiqni yorishadi. Bunday holatda qanday yo‘l tutishni bilgan inspektorlar esa daryoni qirg‘og‘iga suzib chiqishadi. Buni ko‘rgan huquqbuzarlar inspektorlarni haqoratlab, ov qurollarini olib, qochib ketishadi.
Mazkur holat bo‘yicha huquqbuzarlarning shaxsiga aniqlik kiritish hamda holatga huquqiy baho berish maqsadida tegishli hujjatlar Toshkent viloyati prokuraturasi va viloyat IIBga yuborildi.
