Toshkentda fuqaroni Kanadaga ishga yubormoqchi bo‘lgan firibgar ushlandi
Hozirda unga nisbatan 2 ta modda bilan jinoiy ish ochilgan.
Toshkent shahrining Uchtepa tumanida fuqaroni Kanada davlatiga ishga yuborishni vaʼda qilgan firibgar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
O‘tkazilgan tezkor tadbirda fuqaro I.A. fuqaro B.O.ning ishonchiga kirib, uni yuqori lavozimda ishlovchi tanishlari yordamida Kanada davlatiga ishga yuborishi va viza hujjatlarini rasmiylashtirib berishi evaziga 1 100 AQSH dollarini olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
