Yana bir o‘zbek filmi xalqaro festivalda g‘olib bo‘ldi
Turkiyada bo‘lib o‘tgan festivalda “Uzum taʼmi” nomli film “Eng yaxshi qisqa metrajli film” deb topildi.
Turkiyaning Izmir shahrida 2–3 may kunlari Turon xalqaro kinofestivali bo‘lib o‘tdi. Unda O‘zbekistondan Eldor Qudratillayev “Dunyo va men” hamda Dmitriy Lebedev “Uzum taʼmi” nomli qisqa metrajli filmlari bilan ishtirok etdi.
Tanlov yakuniga ko‘ra, Dmitriy Lebedevning “Uzum taʼmi” nomli filmi “Eng yaxshi qisqa metrajli film” deb topildi. Shuningdek, Madaniyat vazirligi huzuridagi Kinematografiya agentligi direktori Firdavs Abduxoliqov “Kino sanʼatiga qo‘shgan hissasi uchun” mukofoti bilan taqdirlandi.
Festivalda turkiy xalqlar kino ijodkorlari, Qozog‘iston, Qirg‘iziston, Turkmaniston, Turkiya, Eron, Ozarbayjon va Fransiya, Vengriyadan nomzodlar qatnashdi.
Maʼlumot uchun, “Uzum taʼmi” filmida rollarni taniqli aktyor Farhod Mahmudov nomidagi kinoustaxona aktyorlari Dilyor Fozilov va Roziya Raimqulova ijro etgan. Senariy hammuallifi va rejissyor yordamchisi BDKI Toshkent filiali talabasi Aleksandr Amelin.
