Qirg‘iz-tojik chegarasida otishma yuz berdi
Bunga tojikistonlik cho‘ponlarning harakati sabab bo‘lgan.
Qirg‘iziston-Tojikiston davlat chegarasida o‘qotar quroldan foydalanish bilan bog‘liq hodisa yuz berdi. Bu haqda Qirg‘iziston Milliy xavfsizlik davlat qo‘mitasi xabar berdi.
Departament maʼlumotlariga ko‘ra, taxminan soat 12.20 larda Botken viloyati Leylek tumani Oq-Bosog‘o aholi punkti yaqinida Qirg‘iziston chegarachisi chorva mollarini o‘layotgan tojikistonlik cho‘ponlarni ko‘rib qolgan.
Tojikiston fuqarolari chegarachilarning Qirg‘iziston hududini tark etish talabiga eʼtibor bermay, harbiy xizmatchilarga tosh otishni boshlagan. Cho‘ponlardan biri Qirg‘iziston Respublikasi chegara xizmati yo‘nalishida bir necha marta o‘q uzgan.
Vaziyat keskinlashuvining oldini olish maqsadida Qirg‘iziston chegarachilari havoga ogohlantiruvchi o‘q uzgan, shundan so‘ng cho‘ponlar Tojikiston hududiga qochib ketishgan.
Qirg‘iziston Respublikasi chegarachilari orasida qurbonlar yo‘q. Tasdiqlanmagan maʼlumotlarga ko‘ra, Tojikiston Respublikasi fuqarolaridan biri oyog‘idan yaralangan.
“Ammo jarohat qanday sharoitda, qachon va qayerda olingani nomaʼlum, chunki Tojikiston huquq-tartibot idoralari faqat fotosuratni taqdim etishgan”, — deyiladi Chegara xizmati xabarida.
Yaqin orada tomonlarning uchrashuvi bo‘lib o‘tishi kutilmoqda. Hozirda ikki davlat chegarasidagi vaziyat barqaror ekani aytilmoqda.
