Qisqa muddatli viza bilan borib, mamlakatda qolib ketdi: o‘zbekistonlik Yaponiyadan chiqarib yuborildi
Elchixonasi fuqarolarni mamlakatda noqonuniy yashash va ishlashdan, shuningdek, shubhali ish takliflariga ishonishdan ogohlantirdi.
Yaponiya Immigratsiya agentligi mamlakatda noqonuniy yashab kelgan O‘zbekiston fuqarosini vatanga deportatsiya qildi. Bu haqda O‘zbekistonning Yaponiyadagi elchixonasi matbuot xizmati xabar berdi.
Ma’lum qilinishicha, deportatsiya qilingan fuqaro Yaponiyaga qisqa muddatli viza bilan kirgan. Vizaning amal qilish muddati tugaganidan keyin ham mamlakatni tark etmay, noqonuniy ravishda yashashda davom etgan. Keyinchalik u Yaponiya rasmiylari tomonidan hibsga olingan va O‘zbekistonga deportatsiya qilingan.
Elchixona noqonuniy yashash yoki ishlash holatlari aniqlansa, huquqbuzarlarga nisbatan qonuniy choralar ko‘rilishini eslatdi. Bunday holatlarda shaxs politsiya tomonidan hibsga olinishi, immigratsiya markaziga joylashtirilishi va mamlakatdan chiqarib yuborilishi mumkin.
Shuningdek, Yaponiya hukumati huquqbuzarlarga oid ma’lumotlarni O‘zbekiston tomoniga ham taqdim etishi mumkin. Elchixona fuqarolarni Yaponiyada ishga joylashtirish yoki uzoq muddat qolishga oid shubhali takliflarga ishonmaslikka chaqirdi.
Diplomatik vakolatxona qochqin maqomini olish uchun ariza berish mamlakatda qolish yoki ishlash imkonini beradigan vosita emasligini ham ta’kidladi. Bunday ariza rad etilgan taqdirda immigratsiya markaziga joylashtirish yoki deportatsiya qilish choralari qo‘llanishi mumkin. Ariza berishda yolg‘on ma’lumot yoki firibgarlik usullaridan foydalanish esa jiddiy huquqiy oqibatlarga olib kelishi mumkin.
