Moskvaga tahdid bo'lishi mumkin: AQSh elchixonasi fuqarolarini ogohlantirdi

AQShning Moskvadagi elchixonasi 31-oktyabr kuni «Saritsino» davlat muzey-qo‘riqxonasi hududida ko‘plab insonlarning o‘limiga sabab bo‘lishi mumkin bo‘lgan hodisa yuz berishi xavfi haqida ogohlantirdi. Elchixona AQSh hukumati Rossiya tomoni bilan javob choralarini muvofiqlashtirayotganini bildirdi.

 

Rossiya Federal xavfsizlik xizmati (FSB) Amerika tomoni Rossiya maxsus xizmatlariga Moskvada terakt tayyorlanayotgani haqida xabar berganini tasdiqladi. Idora bu bo‘yicha tegishli ishlar olib borilayotganini ma’lum qildi, deya yozdi TASS.

 

Elchixona ogohlantirishida tahdid Dolskaya ko‘chasi, 1-uy manzilida joylashgan «Saritsino» muzey-qo‘riqxonasi hududiga taalluqli ekani aytilgan. Biroq ehtimoliy hodisaning xususiyati va tahdid manbasi ochiqlanmagan.

 

AQSh elchixonasi o‘z fuqarolariga 31-oktyabr kuni muzeyga bormaslik, odamlar gavjum joylardan chetda bo‘lish, hushyorlikni saqlash va mahalliy OAV xabarlarini kuzatib borishni tavsiya qilgan. Shuningdek, telefonlarni quvvatlangan holda saqlash va yonida shaxsni tasdiqlovchi hujjatlarni olib yurish tavsiya etilgan.

 

«Vajniye istorii» nashrining yozishicha, shu kuni «Saritsino»da soat 17:00 da Xlebniy domda, 18:00 da esa Bajenov zalida konsertlar o‘tkazilishi rejalashtirilgan edi.

 

«Fontanka» nashri muzey-qo‘riqxonaning yagona telefon raqamiga qo‘ng‘iroq qilib, tahdid haqidagi ma’lumot yuzasidan izoh so‘ragan. Nashrga muzey odatdagi tartibda ishlayotgani aytilgan.

 

Biroq «Ostorojno Media» jurnalisti xabariga ko‘ra, keyinchalik muzey-qo‘riqxona texnik sabablarga ko‘ra yopilgan. Hududga politsiya xodimlari yetib kelgan, kirish joyi berkitilgan. Jurnalistning qayd etishicha, hududda vaziyat tinch, tashrif buyuruvchilar esa kam bo‘lgan.

 

Ma’lumot uchun, 2024-yil mart oyida «Krokus Siti Holl» majmuasida sodir etilgan teraktdan oldin ham AQSh elchixonasi Moskvadagi ommaviy tadbirlarga, jumladan, konsertlarga hujum uyushtirilishi mumkinligi haqida ogohlantirgan edi.