Suriyada suv toshqinlari: 7 kishi halok bo'ldi
Kuchli yomg‘ir mamlakatda ko‘priklar va transport infratuzilmasiga zarar yetkazgan.
Suriyada kuchli yog‘ingarchilik oqibatida yuzaga kelgan suv toshqinlari yetti kishining, jumladan, besh nafar bolaning hayotiga zomin bo‘ldi. Yana yetti kishi jarohatlangan, to‘rt kishi bedarak yo‘qolgan. Bu haqda mamlakat Favqulodda vaziyatlar va tabiiy ofatlarni bartaraf etish vaziri Raed as-Saleh ma’lum qildi.
Tabiiy ofat 27-oktyabr kuni boshlangan va Raqqa, Deyr-az-Zor, Xasaka, Halab hamda boshqa hududlarga tarqalgan. Kuchli yomg‘ir va shamol transport infratuzilmasiga zarar yetkazib, bir nechta ko‘prik va suv o‘tkazgichlarning qulashiga sabab bo‘lgan.
Qutqaruv guruhlari so‘nggi 24 soat ichida 550 dan ortiq favqulodda chaqiruvga javob bergan. Suv toshqini xavfi tufayli o‘nlab oilalar, shuningdek, maktablardan yuzlab o‘quvchilar xavfsiz joylarga ko‘chirilgan. Raqqa viloyatidagi qochqinlar lagerlaridan ham yuzlab oilalar evakuatsiya qilingan.
Suriya rasmiylari hozirda suv bosgan uylar, maktablar va shifoxonalardan suvni chiqarish hamda zarar ko‘rgan hududlarda hayotni tiklash ishlarini olib bormoqda. Qutqaruvchilar bedarak yo‘qolgan to‘rt kishini qidirishni davom ettirmoqda.
