AQSH Ukrainaga Patriot raketalarini sotadi: shartnoma qiymati 2,1 mlrd dollar
AQSH Davlat departamenti Ukrainaga 500 dona Patriot PAC-3 raketasini 2,1 milliard dollarga sotishni ma’qulladi. Biroq raketalar Kiyevga 2030-yillarning dastlabki yillaridagina yetkazib berilishi kutilmoqda.
Reuters xabariga ko‘ra, bu Donald Trampning ikkinchi prezidentlik muddati boshlanganidan buyon Ukrainani mudofaa qurollari bilan ta’minlash borasidagi muhim qadamlardan biri bo‘lishi mumkin.
Ukraina Rossiya tomonidan uchirilayotgan ballistik raketalarni urib tushirish uchun qo‘shimcha Patriot raketalariga ehtiyoj sezmoqda. Prezident Volodimir Zelenskiy avvalroq AQSHning muhim raketa yetkazib berish bo‘yicha qarorini qariyb bir oydan beri kutayotganini bildirgan edi.
Biroq qurol-yarog‘ yetkazib berish shartnomalari odatda bir necha yil davom etadi. AQSH qaroridan xabardor manbalarga ko‘ra, hali ishlab chiqarilmagan raketalar Ukrainaga 2030-yillarning boshlarida yetib borishi mumkin. Ukraina Mudofaa vazirligi esa yetkazib berish muddatini tezlashtirish uchun Pentagon bilan muzokara olib bormoqda. Xususan, AQSH arsenalidagi mavjud raketalarni vaqtincha Ukrainaga berish va keyinchalik ularning o‘rnini yangi ishlab chiqarilganlari bilan to‘ldirish varianti ham ko‘rib chiqilmoqda.
Raketalar xaridi Kanada, Germaniya va Norvegiyaning JUMPSTART dasturi orqali ajratadigan mablag‘lari hamda Yevropa Ittifoqining Ukrainani qo‘llab-quvvatlash krediti hisobidan moliyalashtiriladi.
Ma’lumot uchun, Patriot tizimi tez harakatlanuvchi ballistik raketalarga qarshi qo‘llanadigan eng samarali mudofaa vositalaridan biri hisoblanadi. Raketalarning asosiy ishlab chiqaruvchisi Lockheed Martin kompaniyasidir.
Avvalroq, iyul oyida AQSH armiyasi ushbu kompaniya bilan Patriot raketalarini ishlab chiqarish bo‘yicha qiymati 58,6 milliard dollargacha bo‘lgan shartnoma tuzgan edi. Kelishuvga ko‘ra, 2030-yil oxirigacha PAC-3 MSE raketalarini ishlab chiqarish quvvatini uch baravar oshirish rejalashtirilgan.
